ՀՀ կրթության եւ գիտության նախարարությունը կազմակերպում է մրցույթ փառատոն

25 փետրվարի, 2013

ՀԱՅՏԱՐԱՐՈՒԹՅՈՒՆ

Հայաստանի Հանրապետության կրթության և գիտության նախարարությունը 2013 թվականին կազմակերպում է համահայկական մանկապատանեկան նկարչական 4-րդ մրցույթ-փառատոնը` «Հայկական լեռնաշխարհից ծնված ոգին» խորագրով:
Մրցույթի նպատակն է խրախուսել Հայաստանի աշխարհագրության և հայ մշակույթի իմացությունը, նպաստել հայ մանուկների և պատանիների Հայկական լեռնաշխարհի, որպես հայերի հայրենիքի, ինչպես նաև մշակույթի բազմազանության և բազմաշերտության մասին պատկերացումների ձևավորմանը, բնության ու մշակութային երևույթների և դրանց կապի գեղագիտական իմաստավորմանը:

Մրցույթ-փառատոնին կարող են մասնակցել նկարչության հանդեպ սեր և կարողություն դրսևորող 6-18 տարեկան հայերեն ուսուցմամբ վարժարանների և կրթօջախների (այդ թվում` մեկօրյա), մշակութային կենտրոնների սաները, ինչպես նաև այլ դպրոցներ հաճախող հայ և օտարազգի պատանիներ ու անհատներ:

Մրցույթ-փառատոնը նվիրված է Պատմական ու ներկա Հայաստանի, Լեռնային Ղարաբաղի տարբեր հատվածների բնաշխարհին և մշակութային երևույթներին: Մասնակիցներից ակնկալվում է իմաստավորված և գրագետ համակցել աշխարհագրությունն ու մշակույթի տարբեր տարրեր` գեղագիտական անդրադարձ կատարելով բնության և հայ մարդու ստեղծած կոթողներին կամ հերոսական, ստեղծագործական, պոետիկ ոգու դրսևորումներին: Արդյունքում նախատեսվում է ստանալ գեղագիտական և ստեղծագործական նոր ընթերցումներով Հայկական լեռնաշխարհի քարտեզը:

Մասնակիցները կարող են անդրադարձ կատարել պատմական և մշակութային գործիչներին, պատմական իրադարձություններին, երգերին, պարերին, արվեստի տարբեր տեսակներին, ավանդույթներին, խոհանոցին, կենցաղին, ճարտարապետությանը, իրավունքին, փիլիսոփայությանը, կրոնին, կենդական աշխարհին ու բնությանը, առասպելներին և այլնի` դիտարկելով ընտրված երևույթները համապատասխան բնական և մշակութային համատեքստում: Հնարավորության դեպքում, ցանկալի է կրթական հաստատության կամ երկրի կողմից նկարների կենտրոնացված առաքումը` տարբեր տարիքի հատկապես հաջողված նկարների ընտրությամբ:

Մասնակիցները պետք է դիմեն nkarchakan@gmail.com էլեկտրոնային հասցեով մինչև ս./թ. հունիսի 9-ը ներառյալ:

Մրցույթ-փառատոնի առաջին փուլում հաղթողների աշխատանքները կներկայացվեն Գեղագիտության ազգային կենտրոնի ցուցահանդեսում, որը տևելու է հոկտեմբերի առաջին տասնօրյակից մինչև նոյեմբերի առաջին տասնօրյակը: Ցուցահանդեսին մասնակցած բոլոր աշխատանքները կտպագրվեն ցուցահանդեսի ալբոմում:
Մասնագիտական հանձնաժողովի եզրակացության, ինչպես նաև ցուցահանդեսի հանդիսատեսի քվեարկության արդյունքներով հոկտեմբերի առաջին տասնօրյակում կհայտարարվեն երկրորդ փուլի հաղթողները: Մրցույթ-փառատոնի առաջին փուլի բոլոր հաղթողները կստանան ցուցահանդեսի ալբոմ: Երկրորդ փուլում հաղթողները կստանան նաև հիմնական և խրախուսական մրցանակներ:

Համահայկական մանկապատանեկան նկարչական 4-րդ մրցույթ-փառատոնի շրջանակներում նախատեսվում են նաև լրացուցիչ միջոցառումներ, որոնց ցանկը և ժամանակացույցը կներկայացվի ընթացքում:

Մրցույթ-փառատոնին մասնակցող դպրոցների մանկավարժների համար կկազմակերպվի և կտեսագրվի սեմինար, որը ապրիլ ամսին կտեղադրվի Գեղագիտության ազգային կենտրոնի պաշտոնական www.nca.am կայքում, Youtube-ում և ՀՀ կրթության և գիտության նախարարության էլեկտրոնային գրադարանի www.spyurq.dasagirq.am կայքում:

Փառատոնի շրջանակներում արտամրցութային կարգով` ցուցահանդեսի կազմակերպման համար, ընդունվելու են նաև կիրառական արվեստի գործեր (ժանյակագործություն, ասեղնագործություն, գորգագործություն, կավագործություն, փաստագործություն և այլն):

Նախատեսվում են նաև այլ տեսակի միջոցառումներ Հայաստանի և Սփյուռքի մասնակիցների համար:

Սույն հայտարարությանը կցվում է մրցույթ-փառատոնի նկարագրությունը:
Հավելյալ հարցերով կարելի է դիմել Հայաստանի Հանրապետության կրթության և գիտության նախարարություն.

հեռ. +374 10 58-13-91
ֆ‎աքս. +374 10 52-73-43
Էլ.փոստ. spyurq@yahoo.com
Կայքէջ. www.edu.am, www.armedu.am
Էջ Facebook-ում. «Սփյուռքի բաժին ՀՀ կրթգիտնախ»

Գեղագիտության ազգային կենտրոն.
հեռ. +374 10 58-75-60
Էլ.փոստ. nkarchakan@gmail.com
Կայքէջ. www.nca.am
Էջ Facebook-ում. «National Center of Aesthetics»

ՀՀ կրթության և գիտության նախարարություն
Գեղագիտության ազգային կենտրոն

ՀԱՅԿԱԿԱՆ ԼԵՌՆԱՇԽԱՐՀԻՑ ԾՆՎԱԾ ՈԳԻՆ

Համահայկական մանկապատանեկան նկարչական 4-րդ մրցույթ-փառատոն

Մրցույթ-փառատոնը նվիրված է հայ Պատմական ու ներկա Հայաստանի, Լեռնային Ղարաբաղի տարբեր հատվածների բնաշխարհին և մշակութային երևույթներին:

Հայկական լեռնաշխարհի թե՛ մշակութային, թե՛ պատմական, թե՛ սոցիալական բազմաշերտությունը, ինչպես նաև բնությունը, դարեր շարունակ խթանել են տարբեր ստեղծագործական և պատմական իրադարձությունները` Հայկական լեռնաշխարհից ծնված ոգու դրսևորումները: Մասնակիցներից ակնկալվում է իմաստավորված և գրագետ համակցել աշխարհագրությունն ու մշակույթի տարբեր տարրեր` գեղագիտական անդրադարձ կատարելով բնության և մարդու ստեղծած կոթողներին կամ հերոսական, ստեղծագործական, պոետիկ ոգու դրսևորումներին:

Մրցույթ-փառատոնի մասնակիցները.

Մրցույթ-փառատոնին կարող են մասնակցել երկու տարիքային խմբեր.
- 6-13
- 14-18:

Մրցույթ-փառատոնի անցկացման կարգը.

Մրցույթը նախատեսված է անցկացնել երկու փուլով:
Առաջին փուլում նկարները մասնակիցների կողմից ներկայացվում են էլեկտրոնային տարբերակով` մինչև ս.թ. հունիսի 9-ը: Մասնագիտական հանձնաժողովի կողմից ընտրվում են լավագույն աշխատանքները` ցուցահանդեսը կազմակերպելու և տպագրվելու նպատակով:
Երկրորդ փուլում մասնակիցները ներկայացնում են իրենց աշխատանքների բնօրինակները` ցուցահանդեսի համար: Երկրորդ փուլում ցուցահանդեսին ներկայացված նկարների հեղինակներից կընտրվեն հիմնական և խրախուսական մրցանակակիրներ (այդ թվում` քվեարկության արդյունքում այցելուների համակրանքի արժանացած 1 մրցանակ):

Ներկայացվող պահանջները.

Նկարները պետք է լինեն 29x42 սմ, 50x35 սմ կամ 70x50 սմ չափի` նկարված ցանկացած ոճի և ցանկացած նկարչական նյութի օգնությամբ (գուաշ, մատիտ, պաստել և այլն): Նշված չափերին չհամապատասխանող աշխատանքները ինքնաբերաբար մերժվելու են:
Գնահատման ընթացքում հաշվի են առնվելու.
- նկարի գաղափարի պատկերայնությունը, յուրօրինակությունը,
- գեղարվեստական կատարումը,
- Ողջունվելու են նախագծային աշխատանքներ

Մեթոդական աջակցությունը.

Մրցույթ-փառատոնին մասնակցող դպրոցների մանկավարժների համար Երևանում կկազմակերպվի սեմինար: Սփյուռքում գործող մանկավարժների համար սեմինարի տեսագրությունը ապրիլ ամսին կտեղադրվի Գեղագիտության ազգային կենտրոնի պաշտոնական www.nca.am կայքում, Youtube-ում և ՀՀ կրթության և գիտության նախարարության էլեկտրոնային գրադարանի www.spyurq.dasagirq.am կայքում:
Ընթացքում նաև կտրամադրվեն գրականության ցանկ, մեթոդական նյութեր, գրականություն, որից կարելի է քաղել պահանջվող տեղեկություններ:

Ակնկալում ենք նաև, որ մանկավարժները նախապատրաստական փուլում կապի մեջ կմտնեն Գեղագիտության ազգային կենտրոնի աշխատանքային խմբի հետ:

Նկարների ներկայացման պայմանները.

Առաջին փուլում նկարները ներկայացվում են PDF կամ JPG ձևաչափով ՀՀ կրթության և գիտության նախարարության և Գեղագիտության ազգային կենտրոնի կողմից համատեղ սպասարկվող nkarchakan@gmail.com էլեկտրոնային հասցեով մինչև 2013թ. հունիսի 9-ը ներառյալ: Նկարների մեծ քանակի և ծավալի դեպքում ցանկալի է դրանք ուղարկել ոչ թե կցելով նամակին, այլ տեղադրելով որևէ առ ցանց ալբոմում (օրինակ` Picassa, 4shared.com և այլ):
Առաջին փուլում նկարը ուղարկելիս հարկավոր է, որ.
- PDF կամ JPG ֆայլերը ունենան նկարի հեղինակի ազգանունը և անունը` որպես ֆայլի անվանում,
- էլեկտրոնային նամակում նշված լինի նկարի անվանումը, չափը և տեխնիկան, հեղինակի անունը և ազգանունը, բնակության երկիրը, քաղաքը, տարիքը և կրթական հաստատությունը (այն դեպքում, եթե նկարը ներկայացվում է ոչ թե անհատի, այլ որևէ կրթօջախի կողմից) և կապի միջոց` էլ. հասցե, հեռախոսահամար, հասցե:
- նկարչությունը դասավանդող մանկավարժի անունը, ազգանունը:
- Ուշադրություն առաջին փուլի համար հայտերը պետք է ներկայացնել միայն էլեկտրոնային տարբերակով` ուղարկելով դրանք nkarchakan@gmail.com էլ. հասցեին:
- Նույն տեղեկություններ պետք է լինեն նաև նկարի հետևի մասում` բնօրինակը երկրորդ փուլին ներկայացնելու ժամանակ:
- Երկրորդ փուլի համար առաջին փուլում հաղթած նկարների բնօրինակները մինչև սեպտեմբերի 16-ը փոստով կամ առձեռն պետք է փոխանցվեն Գեղագիտության ազգային կենտրոն.
- National Centre of Aesthetics, Studio-college, Moskovyan 37, Yerevan, 0001, Armenia 0001, Երևան, Մոսկովյան 37, Գեղագիտության ազգային կենտրոնի ստուդիա-քոլեջ
- Ծրարի վրա պետք է լինի «HAMAHAYKAKAN NKARCHAKAN MRTSUYT» նշումը:

Պարգևները.

Մրցույթ-փառատոնի առաջին փուլի բոլոր հաղթողները կստանան ցուցահանդեսի կատալոգ:
Երկրորդ փուլում հաղթողները կստանան նաև մրցանակներ:

Մրցույթ-փառատոնի ժամանակացույցը.

N	Գործողություն/աշխատանք	Ժամկետ
1	Մանկավարժաների համար մեթոդական սեմինարի անցկացում և կայքում տեղադրում, մեթոդական նյութերի տրամադրում	փետրվար-ապրիլ
2	Առաջին փուլում աշխատանքների ներկայացման վերջնաժամկետ	հունիսի 9-ը
3	Առաջին փուլի արդյունքների ամփոփում	մինչև հուլիսի 7-ը
4	Երկրորդ փուլի աշխատանքների բնօրինակների ներկայացման վերջնաժամկետ	սեպտեմբերի 16-ը
5	Ցուցահանդեսի բացում	հոկտեմբերի երկրորդ տասնօրյակ
6	Ցուցահանդեսի փակում և հաղթողների հայտարարում	նոյեմբերի երկրորդ տասնօրյակ
7	Հաղթողների հայտարարում, ալբոմի շնորհանդես և փակման արարողություն	դեկտեմբեր

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր