Հայոց ցեղասպանության 100-րդ տարելիցին նվիրված գրքի շնորհանդես Աթենքում

11 նոյեմբերի, 2015

Նոյեմբերի 11-ին Հունաստանի խորհրդարանի նախկին շենքում կայացավ Սալոնիկի «Արիստոտել» համալսարանի պրոֆեսոր, փիլիսոփայության դոկտոր Իոաննիս Խասիոտիսի «Եղբայրական ազգերը փոթորկի մեջ. հայերը և հույները Արևելյան հարցի մեծ ճգնաժամերում (1856-1914)» գրքի շնորհանդեսը: Միջոցառումը կազմակերպվել էր Հայոց Ցեղասպանության 100-րդ տարելիցի Հունաստանի միջոցառումները համակարգող հանձնաժողովի կողմից` Հունաստանում ՀՀ դեսպանության հովանու ներքո:

Միջոցառմանը ներկա էին Հունաստանի Խորհրդարանի նախկին նախագահ Ապոստոլոս Կակլամանիսը, Կիպրոսի Կրթության նախկին նախարար Քլերի Ագելիդուն, Հունաստանի ԱԳՆ դեպարտամենտի տնօրեն Յորղոս Պուկամիսասը, Հայաստանում Հունաստանի նախկին դեսպան Լեոնիդաս Խրիսանթոպուլոսը, Հունահայոց առաջնորդ Գերաշնորհ Տ. Խորեն Արքեպիսկոպոս Տողրամաջյանը, Հունաստանում հավատարմագրված դիվանագիտական ներկայացուցչությունների անդամներ, հունահայ համայնքային կառույցների, գիտական և կրթական շրջանակների ներկայացուցիչներ:

Ողջույնի խոսքով հանդես եկան Հունաստանում Հայաստանի դեսպան Գագիկ Ղալաչյանը և Հայոց Ցեղասպանության 100-րդ տարելիցի հունաստանյան միջոցառումները համակարգող հանձնաժողովի ներկայացուցիչ Քերոբ Էկիզյանը: Իր խոսքում դեսպան Ղալաչյանը նշեց, որ Արևելյան հարցի շուրջ պրոֆեսոր Խասիոտիսի ծավալուն մենագրությունը գալիս է լրացնելու Հայկական հարցի և ցեղասպանության թեմայով վերջինիս ուսումնասիրությունների հարուստ ցանկը և ամրագրելու նրա բացարձակ հեղինակությունը` որպես հայ-հունական հարաբերությունների բացառիկ գիտակ և հայ ժողովրդի նվիրյալ բարեկամ:

Ելույթներով հանդես եկան Աթենքի Կապոդիստրիասի անվան պետական համալսարանի դասախոս Էվանթիս Հաջիվասիելուն, Կիպրոսի համալսարանի դասախոս Պետրոս Պապապոլիվուն, գրող, պատմաբան Սարգիս Աղաբացյանը և մենագրութան հեղինակ Իոաննիս Խասիոտիսը: Քննարկման մոդերատորն էր Մեցովոյի պետական համալսարանի դասախոս, Կոնստանդնուպոլսեցիների հայրենակցական միության նախագահ Նիկոլաոս Ուզունօղլուն:

Տեղեկանք։ Պրոֆեսոր Խասիոտիսի աշխատությունն ընդգրկում է 1856-ից 1914 թվականները և Արևելյան հարցին անդրադառնում է երբևէ չուսումնասիրված` համեմատական տեսանկյունից` զուգահեռ ներկայացնելով տվյալ ժամանակաշրջանում հայ և հույն ժողովուրդների պատմական իրադարձություններն աշխարհաքաղաքական լայնընդգրկուն համայնապատկերում: Հայկական հարցը ականավոր պատմաբանի գիտական գործունեության առանցքային թեմաներից մեկն է, ինչի վկայությունն են վերջին տասնամյակներում լույս տեսած տարաբնույթ ուսումնասիրություններն ու հոդվածները: 2011 թվականին Իոաննիս Խասիոտիսը ՀՀ Նախագահի հրամանագրով պարգևատրվել է Հայաստանի Հանրապետության Մովսես Խորենացի մեդալով` հայ և հույն ժողովուրդների միջև դարավոր բարեկամության ամրապնդման գործում ներդրած ավանդի, Հայոց ցեղասպանության գիտական հիմնավորման համար:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր