Դեսպան Տիգրան Մկրտչյանը մասնակցել է Մշակութային դիվանագիտության հունական ինստիտուտի առցանց քննարկմանը

05 հուլիսի, 2022

Դեսպան Տիգրան Մկրտչյանը մասնակցել է Մշակութային դիվանագիտության հունական ինստիտուտի հնգամյակին նվիրված առցանց քննարկմանը

Հուլիսի 5-ին տեղի ունեցավ Մշակութային դիվանագիտության հունական ինստիտուտի հիմնադրման հնգամյակին նվիրված առցանց միջոցառում, որին հրավիրված էր և ուղերձով հանդես եկավ նաև Հունաստանում ՀՀ արտակարգ և լիազոր դեսպան Տիգրան Մկրտչյանը:

Իր ուղերձում դեսպան Մկրտչյանը շնորհավորեց Մշակութային դիվանագիտության հունական ինստիտուտին գործունեության հնգամյակի կապակցությամբ և ընդգծեց, որ, հիմնելով իր քույր կազմակերպությունները աշխարհի տարբեր անկյուններում, այն ստանում է միջազգային բնույթ, ինչը հաջող գործունեության ցուցանիշ է: Դեսպանը հույս հայտնեց, որ մոտ ապագայում հնարավոր կլինի նաև հիմնել ինստիտուտի հայկական մասնաճյուղը:

Հայաստանի Հանրապետության դեսպանը կարևորեց մշակութային դիվանագիտության դերը թե´ միջպետական հարաբերություններում և թե´ միջազգային ասպարեզում ներկայացվող երկրի հեղինակության, դիրքերի ամրապնդման, արտաքին քաղաքական օրակարգային հարցերը առաջ մղելու հարցում: Դեսպանը սեփական աշխատանքային փորձից օրինակներ բերեց, որոնք նպաստել են Հայաստանի դերի և իմիջի բարձրացմանը գործուղված երկրներում, ինչպես նաև մեծ դեր են խաղացել արտաքին քաղաքականության օրակարգային հարցերի առաջ մղման խնդրում: Տիգրան Մկրտչյանը նաև ներկայացրեց մշակութային դիվանագիտության այնպիսի ծրագրեր, որոնք ներկայացման ձևաչափում լինելով լոկալ կամ տեղային՝ կարճ ժամանակահատվածում ստացել են գլոբալ բնույթ, արժանացել համաշխարհային մամուլի ուշադրությանը և մեծ տարածում են գտել:

Դեսպանն իր խոսքի ավարտին նշեց, որ Հայաստանի և Հունաստանի նման երկրները կարիք ունեն մշակութային դիվանագիտությունը հռչակելու որպես կարևոր ռազմավարական ուղղություն և ներառելու կառավարական ծրագրերում: Իսկ միջազգային հարթակներում այս երկրները ծավալում են ակտիվ համագործակցություն, ինչպիսի օրինակ է Հնագույն քաղաքակրթությունների ֆորումը, որն էլ ավելի ակտիվ դրսևորվելու ներուժ ունի:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր