Հայաստան – Հունաստան դիվանագիտական հարաբերությունների հաստատման 30-ամյակին նվիրված միջոցառում Աթենքում

12 հոկտեմբերի, 2022

Հոկտեմբերի 12-ին Աթենքի թերթերի խմբագիրների ընկերակցության շենքում Հունա-հայկական բարեկամության ընկերակցությունը և Հունաստանում Հայաստանի Հանրապետության դեսպանությունը համատեղ կազմակերպել էին Հայաստան – Հունաստան դիվանագիտական հարաբերությունների հաստատման 30-ամյակին նվիրված միջոցառում:

Միջոցառմանը ներկա էին Հունա-հայկական բարեկամության ու Աթենքի թերթերի խմբագիրների ընկերակցությունների անդամներ, Հունաստանի կառավարության պաշտոնյաներ, խորհրդարանականներ, հայ հոգևոր դասի ներկայացուցիչներ, մտավորականներ, ինչպես նաև հայ համայնքի կազմակերպությունների բազմաթիվ ներկայացուցիչներ:

Միջոցառման համակարգող, հայտնի լրագրող պարոն Կոստաս Պլիակոսն ընթերցեց Հունաստանի վարչապետ Կիրիակոս Միցոտակիսի ողջույնի ուղերձը, որին հաջորդեց հայ-հունական դիվանագիտական հարաբերությունների մասին պատմող տեսահոլովակի ցուցադրում։ Կոստաս Պլիակոսը, կարևորելով դիվանագիտության դերը հատկապես ներկայիս համաշխարհային անվտանգության մարտահրավերների համատեքստում, ընդգծեց Կովկասի տարածաշրջանում խաղաղության հաստատման գործում Հունաստանի և Եվրամիության հնարավորություններերն ու պատրաստակամությունը։

Միջոցառման հիմնական բանախոսներին էին Հայաստանում Հունաստանի առաջին և Հունաստանում Հայաստանի գործող դեսպանները։ Դեսպան Լեոնիդաս Խրիսանթոփուլոսն իր խոսքում ներկայացրեց Խորհրդային Միությունից Հայաստանի անկախացումից ի վեր տեղի ունեցած զարգացումները, իրադարձությունները, երկկողմ հարաբերությունների հաստատման գործընթացը: Անդրադարձավ Հայաստանի համար 90-ականների դժվար տարիններին, մարտահրավերներին և սպառնալիքներին, ինչպես նաև հնարավորություններին:

Հունաստանում ՀՀ դեսպանության արտակարգ դեսպանորդ և լիազոր նախարար տիկին Հասմիկ Դաշտոյանն էլ միջոցառման մասնակիցներին ընթերցեց Հունաստանում ՀՀ դեսպան պարոն Տիգրան Մկրտչյանի ելույթը։ Դեսպանն իր խոսքում անդրադարձավ վերջին երեք տասնամյակներում հայ-հունական հարաբերություններում արձանագրված ձեռքբերումներին, քաղաքական, տնտեսական, մշակութային և կրթական շփումներին, հարաբերություններում Հունաստանում հայ համայնքի ունեցած ավանդին, ինչպես նաև խոսք գնաց Հայաստանում փոքրաթիվ, սակայն ակտիվ, հունական համայնի մասին։ Դեսպանն ամփոփեց խոսքն ասելով որ հայ-հունական հարաբերություններն այնչափ առաջընթաց են ապրես այս տարիներին, որ «առկա են բոլոր նախապայմանները այդ հարաբերությունների մակարդակը բարձրացնելու՝ հաղորդելով դրանց ռազմավարական բնույթ»։

Ողջույնի խոսքերով հանդես եկան Հունա-հայկական բարեկամության ընկերակցության նախագահ Անդոնիոս Պավլիդիսը, իշխող՝ «Նոր Ժողովրդավարություն» կուսակցության ներկայացուցիչ, Հունաստան-Հայաստան խորհրդարանական բարեկամության խմբի նախագահ Դիմիտրիս Մարկոպուլոսը, հիմնական ընդդիմադիր «Սիրիզա – Առաջադեմ դաշինք» կուսակցության պատգամավոր Յանիս Ամանատիդիսը, «ՊԱՍՕԿ-Փոփոխության շարժում» կուսակցության մամուլի խոսնակ Դիմիտրիս Մանդզոսը` կուսակցության առաջնորդ Նիկոս Անդրուլակիսի անունից:

Անտոնիոս Պավլիդիսն իր խոսքում կարևորեց երկու բարեկամ երկրների համագործակցությունը և Հունա-հայկական ընկերակցության դերը երկկողմ կապերի ամրապնդման գործում։ Անդրադարձավ նաև Հայաստանի հանդեպ Ադրբեջանի վերջին ագրեսիային և միջազգային հանրության պատշաճ արձագանքի կարևորությանը։ Դիմիտրիս Մարկոպուլոսն անդրադարձավ դարերի խորքից եկող հայ-հունական հարաբերությունների պատմությանը։ Նա իր խոսքում խստորեն դատապարտեց նաև Հայաստանի դեմ ծավալված ագրեսիան, որը իրականացվում է թե՛ տեղեկատվական և թե՛ այլ հիբրիդային ձևերով: Յանիս Ամանատիդիսն անդրադարձավ միջխորհրդարանական դիվանագիտությանը, միջխորհրդարանական խմբերի համագործակցությանը, ներկայացրեց գրանցած արդյունքները։ Դիմիտրիս Մանդզոսը՝ Նիկոս Անդրուլակիսի անունից, ողջույնի խոսք հղեց միջոցառման կազմակերպիչներին և ներկաներին, ընդգծելով, որ հայ-հունական հարաբերությունները եղել և մնում են կայուն և բարեկամական։

Բոլոր ելույթ ունեցողները խստորեն դատապարտեցին ՀՀ տարածքային ամբողջականության, ինքնիշխանության, հայ ժողովրդի դեմ ուղղված ադրբեջանական ագրեսիան` կոչ անելով միջազգային հանրությանը հատկապես` ԵՄ-ին հստակ դիրքորոշում որդեգրելու և գործնական քայլեր ձեռնարկելու` ադրբեջանական ագրեսիան դատապարտելու ուղղությամբ: Միաժամանակ բանախոսներն ընդգծեցին Հայաստանի և Հունաստանի միջև հարաբերությունների, ինչպես նաև տարբեր ոլորտներում համագործակցության էլ ավելի ընդլայնելու և խորացնելու կարևորությունը`շեշտը դնելով քաղաքական, ռազմական, մշակութային, կրթական և տնտեսական ոլորտների վրա:

Միջոցառմանը հաջորդեց ընդունելություն։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր