TV100 Thessaloniki հանրային հեռուսատեսությունը անդրադարձել է Հունաստանում ՀՀ դեսպան Տ. Մկրտչյանի տված հարցազրույցին, որտեղ մասնավորապես ներկայացվել է Լաչինի միջանցքի շրջափակման արդյունքում Արցախում ստեղծված ներկայիս իրավիճակը

18 հունվարի, 2023

Սալոնիկի TV100 Thessaloniki հանրային հեռուսատեսությունը գլխավոր լուրերի ընթացքում անդրադարձել է Հունաստանում Հայաստանի Հանրապետության դեսպան Տիգրան Մկրտչյանի՝ նույն հեռուստաընկերությանը տված հարցազրույցին, որտեղ մասնավորապես ներկայացվել է Լաչինի միջանցքի շրջափակման արդյունքում Արցախում ստեղծված ներկայիս իրավիճակը։

Գլխավոր լուրերի պատրաստած ռեպորտաժում, որին հետևում է հարցազրույցից մի հատված, մասնավորապես ասվում է․

«Լաչինի միջանցքի շրջափակումից հետո միջազգային դիտորդների ներկայությունը Արցախում կարևորեց Հունաստանում Հայաստանի դեսպան Տիգրան Մկրտչյանը՝ Սալոնիկի Հանրային Հեռուստատեսությանը տված բացառիկ հարցազրույցում։

Ինչպես նշում է դեսպան Մկրտչյանը, այսպես կոչված «բնապահպան ակտիվիստները» շրջափակել են Լաչինի միջանցքը , որը Արցախը Հայաստանին կապող միակ ճանապարհն է։ Արդյունքում՝ տարածաշրջանը հայտնվել է շրջափակման մեջ, ինչը կարող է հումանիտար աղետի պատճառ դառնալ»։

Դեսպան Մկրտչյանի խոսքը հայերեն թարգմանությամբ ներկայացնում ենք ստորև.

«Այո, իրավիճակն այնպիսին է, ինչպես որ ներկայացրեցիք ռեպորտաժում։ Արդեն անցել է 36 օր, ինչ Լաչինի միջանցքը շրջափակվել է մի խումբ մարդկանց կողմից, որոնք հանդես են գալիս որպես ինքնակոչ «էկոակտիվիստներ»։ Սակայն ոչ ոք, նույնիսկ հենց իրենք, չեն հավատում, որ հանդիսանում են բնապահպանության ակտիվիստներ։ Եվ խնդիրն այն է, որ այս պաշարման արդյունքում 120․000 բնակիչ հայտնվել է գերության մեջ։ Այս շրջափակումը, այս պաշարումը տանում է հումանիտար աղետի, քանի որ Լաչինի ճանապարհով օրական 400 տոննա սնունդ և առաջին անհրաժեշտության ապրանքներ էին տեղափոխվում Հայաստանից Լեռնային Ղարաբաղ, և այսօր այդ ապրանքները հնարավոր չէ անցկացնել այդ ճանապարհով։ Միայն թույլատրվում է ռուսական խաղաղապահ ուժերի և Կարմիր Խաչի Միջազգային կազմակերպության մեքենաների մուտքը»։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր