Մայիսի 23-ին դեսպան Տիգրան Մկրտչյանը Պելոպոնեսի համալսարանի քաղաքագիտության և միջազգային հարաբերությունների ֆակուլտետում հանդես եկավ դասախոսությամբ՝ “Հայաստանն այսօր և նրա արտաքին քաղաքականությունը” վերնագրով:

23 մայիսի, 2024

Դասախոսության ընթացքում դեսպան Մկրտչյանը ներկայացրեց Հայաստանի արտաքին քաղաքականության հիմնական ուղղությունները։ Անդրադարձ կատարվեց Հվ․ Կովկասի տարածաշրջանի յուրաքանչյուր պետության հետ Հայաստանի հարաբերություններին և առկա խնդիրներին, շահերի բախումներին և համագործակցության հնարավորություններին:

Դեսպանն անդրադարձավ ինչպես Հայաստան-Ադրբեջան սահմանազատման գործընթացին, այնպես էլ Լեռնային Ղարաբաղում իրականացված էթնիկ զտման և դրան հաջորդած փուլին։

Տիգրան Մկրտչյանը ներկայացրեց Միջազգային արդարադատության դատարանի կողմից ընդունված, պարտադիր իրավական ուժ ունեցող որոշումների Ադրբեջանի կողմից խախտումների դեպքերը, ինչպես նաև 2020 թ․ նոյեմբերի 9-ին կնքված Հայաստանի, Ադրբեջանի և ՌԴ ղեկավարների հրադադարի եռակողմ հայտարարության գրեթե բոլոր կետերի հետևողական ոտնահարումները։

Անդրադարձ կատարվեց ինչպես Լաչինի միջանցքի անօրինական շրջափակմանը, ԼՂ բնակչության դեմ բիրտ ուժի կիրառմանը և իր հայրենիքից բռնի տեղահանմանը, այնպես էլ հայկական մշակութային հուշարձանները վնասելու, աղավաղելու կամ ոչնչացնելու աղաղակող դեպքերին։

Դեսպանը խոսեց Հայաստան-ԵՄ խորացող համագործակցության, ինչպես նաև Հայաստան-Հունաստան ընդլայնվող համագործակցության վերաբերյալ։

Դեսպան Մկրտչյանը ամփոփեց ելույթը Հայաստանի արտաքին քաղաքականության առաջնահերթությունների ներկայացմամբ:

Դասախոսությանը հետևեցին ունկնդիրների հարցերը, որոնք վերաբերում էին ինչպես անվտանգային, այնպես էլ ապագային միտված քաղաքականության հիմնախնդիրներին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր