Հայաստանի դեսպան Տիգրան Մկրտչյանի այցելությունը Հերակլիոնի հնագիտական թանգարան

05 սեպտեմբերի, 2025

Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանը այցելել է Հերակլիոնի հնագիտական թանգարան, որտեղ հանդիպել է թանգարանի ցուցահանդեսների և հավաքածուների տնօրինության ղեկավար Կատերինա Աթանասակիի հետ։

Դեսպան Մկրտչյանը տիկին Աթանասակիի հետ քննարկել է հայաստանյան թանգարանների հետ համագործակցության հեռանկարները։ Դեսպանը ներկայացրել է հուլիսին ՀՀ ԿԳՄՍ նախարար Ժաննա Անդրեասյանի Աթենք կատարած պաշտոնական այցի արդյունքները, Հունաստանի մշակույթի նախարար Լինա Մենդոնիի հետ կնքած փաստաթղթերը, որոնց մեջ կարևոր տեղ է հատկացվում նաև թանգարանային համագործակցությանը և փոխադարձ ցուցահանդեսների կազմակերպմանը։ Այս համատեքստում կարևորվեց Հերակլիոնի հնագիտական թանգարանի հետ համագործակցությունը, հատկապես կրետեմիկենյան և ուրարտական թեմաներով հնարավոր փոխադարձ հետաքրքրություն ներկայացնող ցուցահանդեսների կազմակերպման հնարավորությունը։

Կատերինա Աթանասակին ներկայացրեց Հերակլիոնի թանգարանի առանձնահատկությունները` հավելելով, որ այցելուների թվաքանակով այն շարունակաբար բավական տպավորիչ արդյունքներ է ապահովում։ Միաժամանակ այն մշտապես մասնակցում է Հունաստանի մշակույթի նախարարության կողմից կազմակերպվող արտասահմանյան ցուցահանդեսներին։ Կարևորվեց Հայաստանում և Հունաստանում նմանատիպ ցուցահանդեսների անցկացումը։

Այնուհետև հավաքածուների բաժանմունքի ղեկավար Ջորջիա Ֆլուդայի ուղեկցությամբ դեսպան Մկրտչյանը շրջայց կատարեց և ծանոթացավ թանգարանի անչափ տպավորիչ հավաքածուներին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր