Սուրբ Կարապետ հայկական եկեղեցու հիմնադրման 138-ամյակի տոնակատարություն Ալեքսանդրուպոլիսում

27 հունվարի, 2013

2013թ. հունվարի 27-ին Հունաստանի Ալեքսանդրուպոլիս քաղաքում մեծ շուքով նշվեց Սուրբ Կարապետ հայկական եկեղեցու հիմնադրման 138-ամյակը:

Ալեքսանդրուպոլիսի թաղային խորհրդի, Հայ կրթական և մշակութային «Համազգային» միության տարածքային ստորաբաժանման և հայ համայնքի ներկայացուցիչների ջանքերով կազմակերպվել էին մի շարք միջոցառումներ, որոնց մասնակցեցին նաև շրջանի իշխանությունների, եկեղեցու և զինվորականության հույն ներկայացուցիչներ:

Միջոցառումներին մասնակցում էին նաև շրջանի Կոմոթինի, Կավալա և այլ քաղաքների թաղային խորհուրդների ու հայ համայնքի ներկայացուցիչները:

Հունահայոց առաջնորդ Գերաշնորհ Խորեն եպս. Տողրամաջյանի գլխավորությամբ մատուցվեց պատարագ, կատարվեց եկեղեցում ծառայած կղերաց դասի անցավոր ներկայացուցիչների հոգեհանգստյան արարողություն, մատաղօրհնություն:

Եկեղեցուն կից սրահում կազմակերպվել էր տոնավաճառ և համայնքի ներկայացուցիչ նկարիչ Արմեն Ստեփանյանի աշխատանքների ցուցահանդեսը:

Տոնակատարությունը շարունակվեց «Թրաքի պալաս» հյուրանոցային համալիրի դահլիճում, որտեղ ելույթ ունեցան համայնքի շնորհալի երաժիշտները, ասմունքողները, պարի համույթը, կիրակնօրյա հայկական դպրոցի երգչախումբը, Հայաստանից հրավիրված երգչուհի:

Ողջույնի խոսքով հավաքվածներին դիմեցին Հունաստանում ՀՀ դեսպանության արտակարգ դեսպանորդ և լիազոր նախարար Մինաս Մարտիկյանը, Հունահայոց առաջնորդ Գերաշնորհ Խորեն եպս. Տողրամաջյանը, Ազգային վարչության ներկայացուցիչ Հեքի Աղաբաբյանը, որոնք իրենց ելույթներում ընդգծեցին հայապահպանության, կրթության, մշակույթի, կրոնի կարևորությունը հայ ժողովրդի և մասնավորապես սփյուռքի համար, միասնության ու համախմբման անհրաժեշտությունը արդի ժամանակահատվածում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր