Արցախյան շարժման 25-ամյակին և Սումգայիթյան ոճրագործության զոհերի հիշատակին նվիրված միջոցառումներ Աթենքում

27 փետրվարի, 2013

2013թ. փետրվարի 27-ին Հունաստանում Հայաստանի Հանրապետության դեսպանության և երկրում գործող հայկական համայնքային կառույցների կազմակերպությամբ Աթենքի Նեա Զմիրնի թաղամասում Հայոց ցեղասպանության զոհերի հիշատակին կանգնեցված «Զանգակ» հուշակոթողի մոտ տեղի ունեցավ Արցախյան շարժման 25-ամյակին և Սումգայիթյան ոճրագործության զոհերի հիշատակին նվիրված միջոցառում:

Հունաստանում Հայ առաքելական և Հայ կաթոլիկ եկեղեցիների հոգևորականների կողմից հոգեհանգստյան արարողություն անցկացվեց` Հունահայոց առաջնորդ Գերաշնորհ Խորեն եպս. Տողրամաջյանի գլխավորությամբ:

Հավաքվածների առջև ելույթներով հանդես եկան Հունաստանում Հայաստանի Հանրապետության արտակարգ և լիազոր դեսպան Գագիկ Ղալաչյանը և ՀՅԴ Հունաստանի Հայ Դատի հանձնախմբի ատենապետ Դավիթ Պետրոսյանը:

ՀՀ դեսպանը իր ելույթում մասնավորապես նշեց, որ «Սումգայիթի եղեռնագործության զոհերի հիշատակը խնկարկելով` հպարտությամբ պիտի արձանագրենք նաև Ղարաբաղյան շարժման 25-ամյակը: Շարժում, որի նվիրյալների աննկուն ոգին չկոտրեց անգամ դեկտեմբերյան ավերիչ երկրաշարժը, իսկ անհագուրդ թշնամու սանձազերծած պատերազմի բովում այն թրծվեց, էլ ավելի զորացավ ու դարձավ անպարտելի: Համախմբվածության նույն ոգով և նույն նվիրումով է, որ պետք է ամենքս ջանանք բաղձալի ավարտին հասցնելու հերոսացած բոլոր հայորդիների սկսած հայրենանվերգործը: Մեր սրբազան պարտքն է` հասնել Լեռնային Ղարաբաղի Հանրապետության միջազգային ճանաչմանը` ամրագրելով սեփական ճակատագիրը տնօրինելու, ապահով ու բարեկեցիկ ապրելու Արցախահայության իրավունքը: Հանուն մեր նախնյաց, հանուն Սումգայիթում մարտիրոսված մեր ազգակիցների և գոյամարտում հերոսացած ազատամարտիկների հիշատակի:»

Դեսպան Ղալաչյանը և ՌԱԿ ներկայացուցիչ Խաչիկ Ոսկերչյանը դեսպանության և հունահայ համայնքի կողմից ծաղկեպսակներ զետեղեցին «Զանգակ» հուշակոթողին: Հնչեցին Հայաստանի Հանրապետության և Լեռնային Ղարաբաղի Հանրապետության օրհներգերը:

Միջոցառմանը ներկա էին Հունահայոց Ազգային Վարչության ատենապետն ու անդամներ, Հունաստանում ՀՅԴ և ՌԱԿ կուսակցական կառույցների ղեկավարությունը, “Հայաստան” համահայկական հիմնադրամի Հունաստանի մասնաճյուղի ատենապետը և անդամներ, Հունահայկական առևտրաարդյունաբերական պալատի նախագահն ու վարչության անդամներ, հունահայ համայնքի և համայնքային կառույցների ներկայացուցիչներ, ՀՀ դեսպանության անձնակազմը, զանգվածային լրատվության միջոցների ներկայացուցիչներ:

Երեկոյան կայացավ հունահայ երիտասարդության բողոքի ցույցը ոստիկանական ուժերով շրջապատված Ադրբեջանի դեսպանության առջև: Մոտ մեկ ժամ կայացած ցույցի ընթացքում երիտասարդները, եռագույն դրոշների ներքո, բարձրախոսով վանկարկում էին պահանջատիրական և ադրբեջանական հայատյաց քաղաքականությունը դատապարտող կարգախոսներ: Ցուցարարները կրում էին «Ալիև, դադարեցրու ագրեսիան. Լեռնային Ղարաբաղն արդեն անկախ է» ու «Կասեցնել հայկական հուշարձանների ոչնչացումը Ադրբեջանի կողմից» անգլերեն և հունարեն պաստառներ: Ադրբեջանի դեսպանության ներկայացուցչին հանձնվեց բողոքի նամակ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր