Սպիտակի երկրաշարժի 25-ամյակի հիշատակման միջոցառում Աթենքում

07 դեկտեմբերի, 2013

2013թ. դեկտեմբերի 7-ին Աթենքի կենտրոնական պողոտային հարակից պուրակում տեղադրված խաչքար-հուշարձանի մոտ Հունաստանում Հայաստանի Հանրապետության դեսպանության և Աթենքի քաղաքապետարանի հովանավորությամբ տեղի ունեցավ նորաստեղծ Հույն-հայկական բարեկամության միության անդրանիկ միջոցառումը, որը նվիրված էր 1988թ. Սպիտակի երկրաշարժի 25-ամյա տարելիցին: Խաչքարը կանգնեցվել էր 1996թվականին` ի երախտագիտություն Հունաստանի ցուցաբերած աջակցության:

Միջոցառմանը ներկա էին Հունաստանի կրթության, կրոնական հարցերի, մշակույթի և սպորտի նախարարության ու Աթենքի քաղաքապետարանի ներկայացուցիչներ, Հունաստանի խորհրդարանի, Ատտիկայի մարզային խորհրդի և Աթենքի քաղաքային խորհրդի անդամներ, Հույն-հայկական բարեկամության միության անդամներ, հունահայ համայնքային կառույցների և հույն հասարակայնության ներկայացուցիչներ, լրագրողներ:

Հունաստանի ցամաքային զորքերի «Էվելպիդոն» ռազմական ակադեմիայի հայ կուրսանտները պատվո պահակախումբ էին կազմել:

Հայ առաքելական, ավետարանական և կաթոլիկ եկեղեցիների ներկայացուցիչները երկրաշարժի անմեղ զոհերի հիշատակին հոգեհանգստյան արարողություն կատարեցին:

Ելույթներով հանդես եկան ՀՀ դեսպան Գագիկ Ղալաչյանը և Հույն-հայկական բարեկամության միության վարչության նախագահ, հասարակական գործիչ և դասախոս Նիկոս Լիղերոսը:

Հուշարձանին ծաղկեփնջեր դրվեցին ՀՀ դեսպանության, Հունաստանի կրթության, կրոնական հարցերի, մշակույթի և սպորտի նախարարության, Աթենքի քաղաքապետարանի և Հույն-հայկական բարեկամության միության կողմից:

Միջոցառման ավարտին հնչեցին Հայաստանի և Հունաստանի օրհներգերը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր