Ցեղասպանության ժխտման քրեականացման հարցին նվիրված խորհրդաժողով և Պոնտոսցի հույների ցեղասպանության հիշատակի օրվա միջոցառում Աթենքում

17 մայիսի, 2014

Ս. թ. մայիսի 17-ին Աթենքի լրագրողների միության սրահում տեղի ունեցավ ցեղասպանության ժխտման քրեականացման հարցին նվիրված «Բարբարոսությունն արգելվում է» խորագով խորհրդաժողովը:

Ողջույնի խոսքով հանդես եկան համակազմակերպող կազմակերպությունների ներկայացուցիչներ ՀՅԴ Հունաստանի Հայ դատի հանձնաժողովի կողմից Արաքսի Աբելյանը, Հունաստանի համապոնտիական դաշնության Հարավային Հունաստանի և կղզիների պոնտիական կազմակերպությունների միության նախագահ Յորղոս Վարիթիմիադիսը և Հունաստանի ասորական միության նախագահ Կիրիակոս Բացարասը:

Խորհրդաժողովի հիմնական բանախոսներն էին Հայոց ցեղասպանության ինստիտուտ-թանգարանի տնօրեն Հայկ Դեմոյանը, Հույն-հայկական բարեկամության միության վարչության նախագահ, հասարակական գործիչ և դասախոս Նիկոս Լիղերոսը և Ցեղասպանագետների միջազգային ասոցիացիայի անդամ Վասիլեոս Միխանեցիդիսը, որոնք հանգամանորեն քննության առան օրվա թեմային առնչվող հարցերի ողջ ներկապնակը, պատասխանեցին ներկաների բազմաթիվ հարցերին:

Միջոցառմանը ներկա էին հասարակական կազմակերպությունների և հայրենակցական միությունների, ԶԼՄ-ների ներկայացուցիչներ: ՀՀ դեսպանությունը ներկայացրեց դեսպանորդ Մ. Մարտիկյանը։

Միաժամանակ տեղեկացնում ենք, որ մայիսի 19-ին Աթենքի կենտրոնական Սինտաղմա հրապարակում կայացավ Հունաստանում պետականորեն նշվող Պոնտոսցի հույների ցեղասպանության հիշատակի օրվա միջոցառումը, որին մասնակցեցին և այլոց թվում Անհայտ զինվորի հուշադամբանին ծաղկեպսակ զետեղեցին Հունաստանում ՀՀ դեսպան Գ. Ղալաչյանը և Հայոց ցեղասպանության թանգարան-ինստիտուտի տնօրեն Հայկ Դեմոյանը: Վերջինս նաև օրվա գլխավոր բանախոսն էր:

Վերոնշյալ միջոցառմանը նաև մասնակցում էին Հունաստանի Հայ Դատի հանձնախմբի անդամներ, ՀՅԴ երիտասարդական միության ներկայացուցիչներ: Վերջիններս մասնակցեցին նաև դեպի Թուրքիայի դեսպանություն քայլարշավին և դրա դիմաց կայացած ցույցին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր