Դեսպան Գ. Ղալաչյանի հրաժեշտի հանդիպումները Կիպրոսի Հանրապետությունում

17 հունիսի, 2016

Ս.թ. հունիսի 15-ին Կիպրոսի Հանրապետությունում (նստավայրը` Աթենք) ՀՀ դեսպան Գ.Ղալաչյանը, դիվանագիտական առաքելության ավարտի կապակցությամբ, հանդիպել է Կիպրոսի Հանրապետության նախագահ Նիկոս Անաստասիեդիսի հետ: Վերջինս բարձր է գնահատել ՀՀ դեսպանի ներդրումը երկու եղբայրական պետությունների հարաբերությունների զարգացման ոլորտում, նշելով նրա պաշտոնավարման ընթացքում ամենաբարձր մակարդակով կայացած պետական և պաշտոնական այցերը, որոնք հնարավորություն են ընձեռել նոր մակարդակի բարձրացնել հայ-կիպրական հարաբերությունները: Կարևորվել է ՀՀ Նախագահի ս.թ. մարտի 15-16-ը Կիպրոս պաշտոնական այցի ժամանակ ձեռք բերված պայմանավորվածությունների կատարումը:

Հանդիպման վերջում Կիպրոսի նախագահը մաղթել է Հայաստանին ու հայ ժողովրդին խաղաղություն և բարգավաճում։

Նույն օրը ՀՀ դեսպանը հանդիպում է ունեցել Կիպրոսի Ներկայացուցիչների պալատի նորընտիր նախագահ Դեմետրիս Սիլլուրիսի հետ: Շնորհավորելով վերջինիս նման պատասխանատու պաշտոնում ընտրվելու կապակցությամբ, ՀՀ դեսպանը վստահություն է հայտնել, որ պարոն Սիլլուրիսը նույնպես իր նախորդների նման կշարունակի ջանքեր ներդնել հայ-կիպրական երկկողմ խորհրդարանական կապերի ամրապնդման և միջխորհրդարանական երկխոսության ծավալման ուղղությամբ: Իր հերթին պարոն Սիլլուրիսը կարևորել է ՀՀ դեսպանի դերը երկու բարեկամական երկրների խորհրդարանների միջև կապերի ամրապնդման ոլորտում և մաղթել նրան հետագա հաջողություններ իր ապագա գործունեության մեջ: Հանդիպմանը ներկա էր նաև Կիպրոսի խորհրդարանում հայ համալնքի պետական ներկայացուցիչ Վարդգես Մահտեսյանը։

Ս.թ. հունիսի 17-ին ՀՀ դեսպան Գ.Ղալաչյանը հրաժեշտի հանդիպում է ունեցել Կիպրոսի ԱԳ նախարար Յոաննիս Կասուլիդեսի հետ: Կիպրոսի ԱԳ նախարարը բարձր է գնահատել հայ-կիպրական քաղաքական երկխոսության ուղղությամբ դեսպանության կողմից գործադրված ջանքերի արդյունքում ձևավորված հագեցած օրակարգը։ Հանդիպման ընթացքում կողմերը կարևորել են համագործակցության շարունակականությունն ինչպես երկկողմ, այնպես էլ բազմակողմ ձևաչափերում։

Հանդիպման ընթացքում դեսպան Ղալաչյանը ներկայացրել է Լեռնային Ղարաբաղի հակամարտության շուրջ վերջին զարգացումները, շնորհակալություն հայտնելով ապրիլյան քառօրյա պատերազմի կապակցությամբ Կիպրոսի արտգործնախարարության կողմից արտահայտված սկզբունքային դիրքորոշման համար։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր