ՀՀ Ազգային ժողովի Հայաստան-Կիպրոս միջխորհրդարանական համագործակցության հանձնաժողովի պատվիրակության հանդիպումը Կիպրոսի Ներկայացուցիչների պալատի Արտաքին և եվրոպական հարցերի հանձնաժողովի հետ

02 մայիսի, 2023

Կիպրոսի Ներկայացուցիչների պալատի արտաքին և եվրոպական հարցերի հանձնաժողովի և Կիպրոս-Հայաստան միջխորհրդարանական համագործակցության հանձնաժողովի նախագահ պարոն Հարիս Գեորգիադիսը և հանձնաժողովի անդամներ պրն. Մարիոս Մավրիդիսը (Փոխնախագահ), Ավերոֆ Նեոֆիտուն, Գիորգոս Լուկաիդիսը, Քրիսիս Պանտելիդիսը, Խրիստոս Խրիստուն, Մարիոս Կարոյանը և պատգամավոր Ալեքսանդրա Աթալիդուն հանդիպել են Հայաստանի Ազգային ժողովի Հայաստան-Կիպրոս միջխորհրդարանական հանձնաժողովի պատվիրակության հետ։

Պատվիրակությունը գլխավորում է ՀՀ Ազգային ժողովի Հայաստան-Կիպրոս միջխորհրդարանական համագործակցության հանձնաժողովի Հայկ Կոնջորյանը և խորհրդարանի անդամներ պրն.Վլադիմիր Վարդանյանը, Ռուստամ Բակոյանը, Հայկ Ծիրունյանը, Կարեն Համբարձումյանը և տիկին Արուսյակ Մանավազյանը։ Հանդիպմանը ներկա էր նաև Կիպրոսի խորհրդարանի հայկական կրոնական խմբի ներկայացուցիչ պարոն Վարդգես Մահտեսյանը։

Ողջունելով հայկական պատվիրակությանը` պարոն Գեորգիադիսը նշեց, որ երկու ժողովուրդների ընդհանուր պատմական ուղին նրանց միջև ամուր կապերի հիմքն է և համոզմունք հայտնեց, որ լայն հնարավորություններ կան Կիպրոս-Հայաստան երկկողմ հարաբերությունների հետագա ամրապնդման շուրջ համագործակցության համար։

Ինչպես նկատեց պարոն Գեորգիադիսը, ներկայիս միջազգային անկայունությունը նպաստում է այնպիսի երկրների ռեվիզիոնիստական և էքսպանսիոնիստական միտումներին, ինչպիսիք են Թուրքիան և Ադրբեջանը, և, հետևաբար, Կիպրոսն ու Հայաստանը պետք է ակտիվացնեն իրենց համագործակցությունը։

Պարոն Գեորգիադիսը նշեց նաև, որ 2020 թվականի սեպտեմբերին Ադրբեջանի հարձակումը Լեռնային Ղարաբաղի վրա և դրան հաջորդած մարդկանց վտարումը իրենց պապենական տներից, եկեղեցիների և պատմական հուշարձանների պղծումը, ինչպես նաև Լաչինի միջանցքի շարունակական շրջափակման հետևանքով առաջացած լուրջ հումանիտար ճգնաժամը, հիշողություններ արթնացրին 1974 թվականի Կիպրոսի ողբերգության մասին:

Միևնույն ժամանակ, անդրադառնալով Կիպրոսի խնդրին, պարոն Գեորգիադիսը նշեց, որ Թուրքիայի ապակայունացնող դերն ու անզիջող կեցվածքը, որն արտահայտվում է ներխուժման և օկուպացիայի արդյունքում ձեռքբերումները համախմբելու՝ վերջինիս շարունակական նպատակների հետապնդման մեջ, լավատեսության տեղ չի թողնում՝ կապված Կիպրոսի խնդրի լուծման հեռանկարների հետ :

Պարոն Կոնջորյանն իր հերթին բարձր է գնահատել երկու երկրների և հատկապես երկու խորհրդարանների մակարդակով երկխոսության և համագործակցության բարձր մակարդակը։

Նա նաև իր անկեղծ շնորհակալությունն է հայտնել Հայաստանի և Լեռնային Ղարաբաղի դեմ Ադրբեջանի ագրեսիայի նկատմամբ Կիպրոսի սկզբունքային դիրքորոշման համար և միևնույն ժամանակ կիպրացի խորհրդարանականներին վստահեցրել է Հայաստանի անմնացորդ աջակցությունն ու նեցուկ լինելը հանուն Կիպրոսի խնդրի լուծման և թուրքական օկուպացիայի դադարեցման արդար պայքարում։

Կիպրոսի Ներկայացուցիչների պալատի Արտաքին և եվրոպական հարցերի հանձնաժողովի անդամները և ՀՀ Ազգային ժողովի Հայաստան-Կիպրոս միջխորհրդարանական համագործակցության հանձնաժողովի պատվիրակության անդամներն ընդգծեցին երկու երկրների միջև երկարամյա բարեկամական կապերը, և կիպրական կողմը շեշտեց իր լիակատար համերաշխությունն ու աջակցությունը բարեկամ հայ ժողովրդին։ Կիպրոսի խորհրդարանականները դատապարտել են Ադրբեջանի և Թուրքիայի ագրեսիան և ռևիզիոնիստական նկրտումները և մատնանշել հետագա համագործակցության և գործողությունների համակարգման անհրաժեշտությունը, հատկապես երկկողմ և միջազգային խորհրդարանական համագործակցության շրջանակներում՝ Կիպրոսի և Հայաստանի առջև ծառացած ընդհանուր սպառնալիքներն ու մարտահրավերները լուծելու նպատակով։

Բացի վերոնշյալը, երկուստեք ընդգծվել է երկու երկրների միջև համագործակցության ամրապնդման հնարավորությունը հատկապես առևտրի, կրթության և զբոսաշրջության ոլորտներում, և կողմերը գոհունակություն են հայտնել երկու երկրների միջև ուղիղ օդային կապի հաստատման փաստի վերաբերյալ։

Հանդիպման վերջում մտքեր են փոխանակվել նաև ընթացիկ հարցերի շուրջ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր