Տիգրան Մկրտչյանը հյուրընկալվել է Ակրոպոլիսի թանգարանի կառավարման խորհրդի նախագահ Կոնստանտինոս-Ավգուստոս Ռիզոսի և թանգարանի գլխավոր տնօրեն պրոֆ. Նիկոլայոս Ստամպոլիդիսի կողմից

02 դեկտեմբերի, 2024

Դեկտեմբերի 2-ին Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանը հյուրընկալվել է Ակրոպոլիսի թանգարանի կառավարման խորհրդի նախագահ Կոնստանտինոս-Ավգուստոս Ռիզոսի և Ակրոպոլիսի թանգարանի գլխավոր տնօրեն պրոֆ. Նիկոլայոս Ստամպոլիդիսի կողմից։

Դեսպան Մկրտչյանը՝ կարևորելով հարուստ մշակութային ժառանգություն ներկայացնող երկրների` Հայաստանի և Հունաստանի միջև սերտ համագործակցության հնարավորությունները, ընդգծեց այդ ուղղությամբ հարաբերություններին նոր շունչ հաղորդելու անհրաժեշտությունը՝ երկկողմ բարձր մակարդակով միջոցառումների կազմակերպման միջոցով։

Անդրադառնալով երկկողմ մշակութային համագործակցությանը` դեսպանն ընդգծեց հելլենիստական, նախաքրիստոնեական և վաղ քրիստոնեական ժամանակաշրջաններին նվիրված փոխադարձ ցուցահանդեսների կազմակերպումն ու այս համատեքստում առաջարկեց դիտարկել հստակ գործողությունների ծրագրի մշակում` Հայաստանի համապատասխան կառույցների հետ համագործակցելով։

Ակրոպոլիսի թանգարանի ղեկավար կազմի ներկայացուցիչները, իրենց ակնածանքն արտահայտելով հայ մշակույթին և պատմությանը նվիրված աշխարհի տարբեր անկյուններում անցկացվող ցուցահանդեսների նկատմամբ, կարևորեցին նմանատիպ ցուցահանդեսների կազմակերպման անհրաժեշտությունը նաև Հունաստանում, ինչպես նաև Հին Հունաստանի դասական և հելլենիստական ժամանակաշրջաններին նվիրված ցուցահանդեսի կազմակերպումը Հայաստանում։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր