Դեսպան Տիգրան Մկրտչյանի հանդիպումը Դորա Բակոյանիի հետ՝ Հայաստան-Հունաստան և տարածաշրջանային հարցերի շուրջ

25 փետրվարի, 2025

Հունաստանում ՀՀ դեսպան Տիգրան Մկրտչյանը հանդիպել է Հունաստանի խորհրդարանի Ազգային պաշտպանության և արտաքին հարաբերությունների հարցերով մշտական հանձնաժողովի նախագահ տիկին Դորա Բակոյանիի հետ։

Դեսպան Մկրտչյանը հանդիպման ընթացքում անդրադարձել է Հայաստան-Հունաստան և Հայաստան-Եվրոպական Միություն փոխհարաբերություններին, ներկայացրել է այս ուղղությամբ արձանագրված վերջին զարգացումները։

Դեսպան Մկրտչյանը ներկայացրել է Հարավային Կովկասի տարածաշրջանում վերջին զարգացումները, մասնավորապես՝ Հայաստան-Ադրբեջան և Հայաստան-Թուրքիա բանակցային գործընթացները։ Նշվել է, որ խաղաղության պայմանագրի կնքման հիմքում պետք է ընկած լինի միմյանց տարածքային ամբողջականության ճանաչումը՝ հիմնված 1991թ. Ալմա-Աթայի հռչակագրի վրա։ Դեսպան Մկրտչյանը ահազանգել է Բաքվում պահվող հայ գերիների և քաղաքացիական անձանց դեմ կեղծ դատավարությունների իրականացման փաստի վերաբերյալ։

Տիկին Բակոյանին ողջունել է Հայաստանի մտադրությունը՝ կարգավորելու հարաբերությունները Ադրբեջանի և Թուրքիայի հետ՝ նշելով, մասնավորապես, որ հայ-թուրքական սահմանի բացումը կնպաստի տարածաշրջանում առավել կառուցողական մթնոլորտի ձևավորմանը։ Նա նշել է, որ միջազգային իրավունքի կիրառումը ճգնաժամ է ապրում, սակայն Հունաստանի դիրքորոշումը հստակ է, որ հակամարտությունների կարգավորումը պետք է տեղի ունենա միջազգային իրավունքի նորմերին համապատասխան։

Երկուստեք անդրադարձ է կատարվել Հայաստանի Հանրապետության և Հունաստանի միջև բարձր մակարդակի շփումների կարևորությանը, կարևորվել է երկու խորհրդարանների միջև համագործակցության ակտիվությունը, և այդ նպատակով դեսպան Մկրտչյանը տիկին Բակոյանիին հրավիրել է այցելել Հայաստան, ինչը զրուցակցի կողմից դրական է ընդունվել։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր