ՀՀ դեսպան Տիգրան Մկրտչյանի հանդիպումը Հունաստանի արտահանողների ընկերակցության (SEVE) նախագահի հետ

11 փետրվարի, 2026

Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանը Սալոնիկ կատարած աշխատանքային այցի շրջանակներում հանդիպել է Հունաստանի արտահանողների ընկերակցության (SEVE) նախագահ Սիմեոն Դիամանտիդիսին։

Հանդիպմանը քննարկվել են Հայաստանի և Հունաստանի միջև երկկողմ առևտրաշրջանառությանն առնչվող հարցեր։ Դեսպան Մկրտչյանը նշել է, որ տնտեսական փոխգործակցությունն այն ուղղությունն է, որն ունի անսահմանափակ զարգացման ներուժ։ Այդ համատեքստում ներկայացվել են երկկողմ առևտրի հիմնական ուղղությունները` միաժամանակ նախանշելով այն ոլորտները, որոնցում երկու երկրները ունեն արտահանման ներուժ։

Սիմեոն Դիամանտիդիսը նշել է, որ ընկերակցությունում ներկայացված են Հունաստանի արտահանման 50%-ից ավելն ապահովող ընկերությունները, և ինքը պատրաստ է ուսումնասիրել Հայաստանի տնտեսությանը հետաքրքրող ուղղությունները` արտահայտելով հետաքրքրություն առևտրատնտեսական շփումներն ավելի ակտիվացնելու հարցում։

Դեսպան Մկրտչյանը ներկայացրել է Հայաստանի արտաքին քաղաքական հիմնական ուղղությունները, այդ թվում նաև Եվրոպական Միության հետ ունեցած ռազմավարական փոխգործակցության ընթացքը։

Հանդիպմանը մասնակցել է Սալոնիկում ՀՀ պատվո հյուպատոս Ակիս Դագազյանը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր