Դեսպան Տիգրան Մկրտչյանը դասախոսությամբ հանդես է եկել Ամերիկյան Վեբստեր համալսարանի Աթենքյան մասնաճյուղում

26 մարտի, 2026

Ամերիկյան Վեբստեր համալսարանի աթենքյան մասնաճյուղի հրավերով, համալսարանական, «Ambassadors' Socio-Political Forum» շարքում դասախոսությամբ հանդես եկավ Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանը։

Դասախոսության թեման էր «Հայաստանը և նրա արտաքին քաղաքականություն»։

Դասախոսության ընթացքում դեսպան Մկրտչյանն անդրադարձավ Հայաստանի արտաքին քաղաքականության կարևոր զարգացումներին, մասնավորապես՝

• Հայաստան–Ադրբեջան հարաբերություններին և խաղաղության համաձայնագրի կնքումից հետո ձևավորվող հեռանկարներին, ինչպես նաև տարածաշրջանային զարգացման հնարավորություններին,

• «Խաղաղության խաչմերուկ» նախաձեռնությանը և դրա կապին «Հանուն խաղաղության և բարգավաճման Թրամփի ուղու» հետ՝ համաձայն Վաշինգտոնում օգոստոսին ստորագրված փաստաթղթերի, ընդգծելով դրա միջազգային աջակցությունն ու իրավական հիմքերը, տարածաշրջանային տնտեսական զարգացման, ինչպես նաև դրա քաղաքական նշանակության տեսանկյունից,

• Հայաստան–Թուրքիա հարաբերությունների կարգավորման ընթացիկ վիճակին և հեռանկարներին,

• Հայաստան–ԱՄՆ ռազմավարական համագործակցությանը՝ անդրադառնալով 2025 թվականի հունվարին ստորագրված ռազմավարական գործընկերության փաստաթղթին, որը ներառում է տնտեսության, անվտանգության և պաշտպանության, ժողովրդավարության և միջանձնային կապերի ոլորտները` մանրամասն անդրադառնալով նաև 2025 թ. օգոստոսին Վաշինգտոնում կնքված երկկողմ փաստաթղթերին, ինչպես նաև 2026 թ. սկզբին ԱՄՆ փոխնախագահի Հայաստան կատարած այցին, որոնց միջոցով վերահաստատվել և շոշափելի զարգացում է գրանցվել ԱՄՆ հետ ռազմավարական հարաբերություններում,

• Հայաստան–Եվրոպական միություն հարաբերությունների աննախադեպ առաջընթացին՝ շեշտելով Բրյուսելում ստորագրված ռազմավարական գործընկերության օրակարգը և ընդհանուր արժեքների ու փոխադարձ շահերի վրա հիմնված բազմաշերտ համագործակցությունը,

• Հայաստան–Հունաստան հարաբերություններին և դրանց ռազմավարական մակարդակի բարձրացման հնարավորություններին,

• Հայաստանի հարաբերություններին այլ գործընկերների՝ Ռուսաստանի, Վրաստանի, Իրանի և ասիական երկրների հետ, ինչպես նաև դիվանագիտական կապերի աշխարհագրության ընդլայնմանը։
Դասախոսությանը հաջորդեց հարցուպատասխանի հատվածը, որի ընթացքում դեսպան Տիգրան Մկրտչյանը պատասխանեց բոլոր հնչեցված հարցերին՝ անդրադառնալով ոչ միայն վերոնշյալ թեմաներին, այլ նաև քաղաքական և պատմական բնույթի հարցերին։ Այս համատեքստում ընդգծվեց նաև մշակութային դիվանագիտության կարևորությունը, հատկապես հայ-հունական հարաբերությունների ամրապնդման տեսանկյունից։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր